Heit is Kerb

Pfälzer Mundart Lied

 

Heit is Kerb in unserm Dorf.
Mädel, du dich butze!
Zieh dei hellbloo Reckelche a
un dei grien Mutze!

Heit is Kerb in unserm Dorf.
Heit owend kummt die Tande,
bringt e Sack voll Lewwerworscht
for die Musikande.

Heit is Kerwe, morje is Kerwe,
bis de Dinschdagowend.
Wann ich zu meim Schätzel kumm,
sag ich hibsch "Gunowend!"

Guden Owend, Schätzel!
Back mer aach e Brezel!
Wann de mer kää Brezel backsch,
bische net mei liewer Schatz.

Guden Owend, Schätzel,
ich back der aach e Brezel,
net so dick un net so dinn,
daß se in dei Maul geht nin.

Hibsch gunowend, Lisabeth,
weis mer, wo dei Bettlad steht!
Hinnerm Ofe an de Wand!
Han gemänt, du wischt's schun lang.

Trutz net so un trutz net so!
Ich kann dich noch ernähre!
Ich han e Stick met Erbse drauß
un e Bamm voll Beere.

Roder Klee un weißer Klee,
Fudder for mei Gailche.
Wann mei Vadder ins Wertshaus geht,
macht mei Mudder e Mailche.

Wann er awwer Kaffee trinkt,
lacht se, wie e Dischdelfink.
Dischdelfink geht net so schwer.
Wann se nor e Amschel wär!

Hopp-hopp-hopp, mei Geld is fort,
in Frankfort liegt mei Ranze.
Scher dich for, du stolzi Krott,
mit dir will ich net danze.

Derkem is e schääni Stadt,
ringserum mit Rewe.
Wer e Schatz in Derkem hat,
hat e luschdig Läwe.

Dreimol um dei Haisje rum,
's Bett steht hinnerm Ofe.
Mach mer schnell dei Deerche uff,
ich will heit bei der schloofe.

Pälzer Buwe, die sin stark
im Esse un im Trinke,
un sie dun beim Kerwedanz
als de Mädcher winke.

Un zu unserem Kerweschamus
gebt's als roscht'sche Ritter,
hinnedruff e Grumbeerschnaps
un e Maacherbidder.

Weißer Kees mit Baurebrot,
Zwiwwle net vergesse!
Odder aach mit Quellgrumbeere!
's is e feines Esse!

Waffeleise, Waffle backe
mit drei Dutzend Eier
un noch feini Weisoß druff.
Un 's is net mol deier.

wanderkarten pfalz


Pfalz Wanderkarten

Unter www.pfalzando.de können Sie Wanderkarten und Wanderführer für den Pfälzerwald und die Pfälzer Jakobswege bestellen.

pfälzer mundart musik cd